سالفة ورباط سالفة الشيخ اكو شيخ خير ومعدل وفريضة مالت بيه الدنيا بعد ماجان عنده حلال ومال وكاع صفه

 

سالفة ورباط

سالفة الشيخ

اكو شيخ خير ومعدل وفريضة مالت بيه الدنيا

بعد ماجان عنده حلال ومال وكاع صفه

كلشي ماكو بعد شيسوي وهو صاحب عويل كتلهم الجوع هذاك اليوم كاعد ويفكر شيسوي وحسبه اتجيبه وحسبه اتوديه مالكه حل اجت عليه زوجته كالته اكلك الشيخه مال كبل عوفها هسه وكل جيل اليحكم بيامه احجيلي باليوم انت اذا اتظل هيجي كاعد مو راح نموت من الجوع روح اطلع اشتغل وشوف الوادم وين تشتغل اشتغل وياهم جا شنهي چارتك انظل هيج

كاللها باجر اطلع الصبح وشوفلي شغله

صبح الصبح طلع وجان يشوف ناس ملتمه 

كاللهم انتم وين رايحين 

كالوله احنه نشتغل فلح ونحصد بكاع شيخ فلان

اتنكب وراح وياهم يشتغل وجان موسم الحصاد وجانو يحصدون الزرع بديهم مو مكينه مثل هسه  

هذا الشيخ الملاچ ابو الكاع اجه يشوف الشغل مال الفلح وكاعه جبيره كلش وزارعها حنطه وشعير وصايره كاعه صفرة من كثر الزرع البيها ويباوع على الفلح شلون يشتغلون اجه وكف يم صاحبنه الشيخ المالت بيه الدنيا وهو مايعرفه

و ظل يشعر ويذب دارميات

  كال

هاي الكاع كاعي واني راعي الكاع

وانا الملاچ بيها وخبر صيتي انذاع

شيليني يدنيا كون علو الغيم

انا صدر السفينه وصرت راعي اشراع

ويادنيا ارد اصعد شيليني

ويادنيا ارد اصعد شيليني

صاحبنه الشيخ من سمعه ذب النكاب ماله

وجاوبه

كاله

جنت شيخ العشيرة وجنت نجم سهيل

وجنت شداد رايه اعلى اليشت ويعيل

مثل حيه ودرج لعبت الدنيا وياي

جنت بالراس غفله وصبحت بالذيل

كبلك شالتنه وحطينه

كبلك شالتنه وحطينه

من رجع الشيخ الملاچ للمضيف كلهم شوفولي سالفة هذا الرجل الجاوبني شنهي

كالوله هذا شيخ وابن جواد مثلك بس دارت الدنيه بيه كاللهم ابنو اله مضيف وساعدوه الى ان يوكف على حيله وانطاه كاع چبيرة

شاهد سالفتنه ورباطها

بعض الناس من تكثر فليساته يظل ايتكلب على الوادم ومايحمد الله ويشكره على نعمته

بويه الدنيا لاتأمن بيها مو تشوف هسه الدنيا تضحكلك وصارت عندك جم فلس وشفت رويحتك فوك الناس بشبر ونغريت ترى يجي يوم وتصير مثل صاحب سالفتنه و تره الدنيا ماتستحي منك

‏